Tasodifiy hikoya: Tanlov uchun maxsus. Foxishasan foxisha... {Silvestr Slay}
Shaytonlar bozorida, tanang pulga sotgansan. Yoring shayton ekanmi, la'natlarga botgansan. Mijozin...davomi

oldiga bordi. G'azab bilan burilib qaradi.
- Erkak emish! Bu kuningdan o'lganing yaxshi!
U eshikni shu qadar qarsillatib yopdiki, derazalar zirillab ketdi.
Yodgorning quloqlari anchagacha shang'illab turdi. U chakkasini barmoqlari bilan qisib olgancha, stolga tirsagini tirab, munkayib o'tirar, Azizaning oqarib ketgan yuzi, titrayotgan lablari ko'z o'ngidan ketmas edi: "Bu kuningdan o'lganing yaxshi!"
Dunyo qiziq ekan. Qachon qarasangiz, yetim deganda qoqilasiz. Yo qismat hammaga baxt ulashayotganida unga yetmay qolganmi? Esinj tanibdiki, odam bo'lsam, nimadir yaxshi ish qilsam, deydi. Uzoqda nurli bir nuqtaday porlab turgan tolega intiladi. Amallab yaqin borganida baxt degan nur yana bir olam nariga ketib qoladi. U yuguraveradi, tole undan qochaveradi.
Choyxonachi Mirzo buvaga ko'maklashib, suv tashib yurganiyam baharnav ekan. Endi to'rtinchi sinfga o'tganda ota o'rnida ota bo'lib qolgan Mirzo buva to'satdan o'lib qoldi. Anchadam buyon tuvakka tushib yotgan Oqila buvi ham cholning qirqi chiqmasidan ko'z yumdi, Chol-kampirning Turkistonga kelin bo'lib tushgan yolg'iz qizi ota-onasining katta ma'rakasini o'tkazib, hovli-joyni sotib ketdi.
Yodgorni, Kelesning o'zidagi internatga joylashtirishdi. O'lib-tirilib o'qidi. G'isht teruvchilik hunarini o'rgandi.
Birinchi maoshini olgan kuni chol-kampirning mozoriga bordi. Mozorni qirtishlab tozaladi. Go'riston qorovuliga pul berib, Qur'on tilovat qildirdi. O'zining ota-onasi nega yo'qligini o'ylab, yig'ladi.
Qurilish tresti unga yotoqxonadan joy berdi. Xullas, yigit kishining boshiga baxt qushi qo'nmay iloji yo'q ekan. Uning ham hayoti bir nav yaxshi bo'lib qoldi. Ikki yilcha shu tarzda ishlab yurdi. Keyin birdan oromi buzildi. Hammasi shim olish bahonasidan boshlandi.